ՏԵՍԱՆՅՈՒԹ. Խնդրեցի ՌԴ-ում ՀՀ դեսպանությանը թույլ տալ ծանոթանալու թեժ գծի աշխատանքներին և նկարահանել. Նաիրա Բաղդասարյան

Նաիրա Բաղդասարյանը ֆեյսբուքյան իր էջում տեսանյութ է հրապարակել և կից գրել. 

«ՌԴ-ում ՀՀ դեսպանությունը արդեն մեկ ամսից ավելի է զբաղված է Ռուսաստանում գտնվող և այս օրերին դժվար կացության մեջ հայտնված ՀՀ քաղաքացիների խնդիրներով: Դեսպանությունը մինչ այս պահը մոտ 3000 հայտադիմում է ստացել և այդ քաղաքացիների մեծ մասը ցանկություն ունի վերադառնալ Հայաստան տարբեր հիմնավորումներով՝ մի մասը կորցրել է աշխանաքը, մի մասը վատառողջ է, մի մասը կացության խնդիր ունի: Նրանց, ովքեր կացության լուրջ խնդիր ունեն, դեսպանատունը տեղավորել է մեձմոսկովյան հյուրատներում՝ մինչ հնարավոր թռիչք: Հյուրատների պայմանները տարբեր են: Նրանք, ովքեր երեխաների հետ են կամ ունեն առողջական խնդիրներ տեղավորվում են հյուրանոցներում: Նրանք ովքեր երիտասարդ են, չունեն առողջական խնդիր և առանց ընտանիքի տղամարդիկ են, տեղավորվում են հանրակացարաններում: Կան ընտանիքներ էլ, որոնք վերադարձի կամ կացարանի խնդիր չունեն, սակայն, այս պահին սուղ սոցիալական պայմաններում են: Նրանց հետ ևս դեսպանությունը կապի մեջ է: 

Երեկ ինձ գրած քաղաքացիներից տիկին Գայանե Տոնոյանին խոստացա, որ կփորձեմ ճշտել, արդյոք տեղ է հասել նրա լրացրած հայցադիմումը, թ՞ե ոչ, քանի որ հաճախ են թռիչքի սպասող քաղաքացիները բողոքում, որ գրանցվում են, բայց իրենց անունը չի հայտնվում հերթացուցակում, որը պարբերաբար հրապարակում է դեսպանությունը իր պաշտոնական էջում: Այդ իսկ պատճառով, խնդրեցի ՌԴ-ում ՀՀ դեսպանությանը թույլ տալ ծանոթանալու իրենց թեժ գծի աշխատանքներին և նկարահանելու դրանք, որպեսզի մեր քաղաքացիները ավելի լավ պատկերացնեն աշխատանքային այն գործընթացը, որի արդյունքում մշակվում են իրենց հայցադիմումները: Տեսանյութում դեպանության մամուլի ծառայության աշխատակից Արամ Ոսկանյանը և արարողակարգի բաժնի պատասխանատու Էդգար Խաչատրյանը ներկայացնում են՝ իրենց կողմից իրականացվող աշխատանքի ողջ ընթացքը»: