«Արեյան չոտկի կասի Լենինի արձանի գլուխն ուր են տարել, ոտքերն ու ձեռքերն ուր են տարել». Հայկ Մարության
Երևանի ավագանու «Իմ քայլը» խմբակցության անդամ Արման Անտոնյանն այսօր ավագանու նիստում բողոքեց քաղաքապետարանի աշխատակազմից, որն իր գրավոր հարցմանը, թե որտեղ են Լենինի և բանվորի արձանները, պատասխանել են, որ տեղեկություն չունեն:
Հայկ Մարությանն էլ կատակով պատասխանեց. «Ես գիտեմ՝ Լենինը որտեղ է գտնվում, բայց արձանի տեղը չգիտեմ»: Դիմելով Երևանի քաղաքապետարանի տեղեկատվության վարչության պետ Հովսեփ Կուբատյանին՝ քաղաքապետը հարցրեց, թե որտեղ են Լենին ու բանվորը:
Սակայն, պարզվեց՝ ոչ ոք չգիտի արձանների գտնվելու վայրը: Մարությանն ասաց. «Ես վստահ գիտեմ մի մարդ, որ այդ հարցերի պատասխանը միշտ ունի: Դա պարոն Արեյանն է: Նա չոտկի կասի ոնց են դեմոնտաժել, գլուխն ուր են տարել, ոտքերն ու ձեռքերն ուր են տարել»:
