Թուրքիայում կորոնավիրուսը բավական արագ է տարածվում: Վարակակիրների թվով այն արդեն առաջ է անցել Իրանից, որը մինչ այդ տարածաշրջանում հիվանդների ամենամեծ թիվն ուներ: Ջոն Հոփկինսի համալսարանի տրամադրած տվյալների համաձայն՝ Թուրքիայում արձանագրվել է կորոնավիրուսով վարակման 86.306 դեպք: Հիվանդներից 11.976-ը բուժվել է, 2017-ը՝ մահացել:

Reuters լրատվական գործակալությունը հաղորդում է, որ Թուրքիայի իշխանությունները կորոնավիրուսով հիվանդների համար հիվանդանոց են կառուցում Ստամբուլի «Աթաթուրք» օդանավակայանի թռիչքուղիների վրա: Այս օդանավակայանը Ստամբուլի հիմնական օդանավակայանն էր, սակայն նոր օդանավակայանի կառուցումից հետո այն արդեն մեկ տարի է՝ օգտագործվում է միայն բեռնատար ինքնաթիռների և պաշտոնական թռիչքների համար:

Օդանավակայանի թռիչքուղիների վրա հիվանդանոցի կառուցումը քննադատության է արժանացել Ստամբուլի քաղաքապետ Էքրեմ Իմամօղլուի կողմից: Վերջինս պնդում է, որ օդանավակայանը կարող է պետք գալ արտակարգ իրավիճակներում, օրինակ՝ երկրաշարժերի ժամանակ: Ըստ Իմամօղլուի՝ նոր հիվանդանոցը կարող էր կառուցվել օդանավակայանից ոչ հեռու գտնվող համաժողովների կենտրոնում կամ մոտակա ազատ դաշտերում: