Մոսկվայում կուժեղացվի քաղաքացիների տեղաշարժի վերահսկողությունը մինչև մայիսի 1-ը

Կորոնավիրուսի համավարակի պատճառով Մոսկվայում սահմանված ժամանակավոր սահմանափակումները կերկարաձգվեն մինչև մայիսի 1-ը, հայտնել Է Մոսկվայի քաղաքապետ Սերգեյ Սոբյանինը, գրում է ria.ru-ն։ 

Քաղաքապետի խոսքով՝ Մոսկվայում կորոնավիրուսի ֆոնին սահմանված սահմանափակումները կանխել են «այս փուլում հիվանդացության պայթյունավտանգ աճը»։ 

«Սա առաջին, համեստ, բայց շատ կարևոր հաղթանակն է, բայց պայքարը չի ավարտվել. համավարակը չի նահանջել»,- հայտարարել է նա։ 

Մայրաքաղաքի իշխանությունները կուժեղացնեն քաղաքացիների տեղաշարժի վերահսկողությունը, որն այժմ իրականացվում է ֆիզիկական անձանց միջոցով, սակայն, քաղաքապետի խոսքով, այսուհետ կիրականացնեն առավելագույնս ավտոմատացված կերպով։ 

«Մեքենայով ուղևորությունների ժամանակ անցագրային ռեժիմի պահպանումը վերահսկելու համար կգործարկվեն ճանապարհային երթևեկության կանոնների խախտումների արձանագրման համար նախատեսված տեսախցիկները և պետավտոտեսչության ճանապարհապարեկային ծառայությունը»,-հավելել է Սոբյանինը: 

Բացի այդ, Մոսկվայում կընդլայնեն անվճար դեղերով ապահովման ծրագիրը։ 

«Բժիշկները կարծում են, որ ներկայիս պայմաններում հավանականությունը, որ սովորական սուր շնչառական վարակների հետևում կորոնավիրուսն է թաքնված, շատ բարձր է։ Այդ պատճառով պետք է անմիջապես սկսել համարժեք բուժումը»,- եզրափակել է Սոբյանինը։