Սպանություն հրազենով. Գեղարքունիքում Porsche Cayenne-ում հայտնաբերվել է տղամարդու դի

Գեղարքունիքի մարզում, այսօր՝ ապրիլի 17-ին, հրազենի գործադրմամբ սպանություն է տեղի ունեցել. ժամը 10։20-ի սահմաններում ոստիկանության Գեղարքունիքի մարզային վարչության օպերատիվ կառավարման կենտրոն ահազանգ է ստացվել, որ Ծովագյուղ-Շորժա-Վարդենիս ավտոճանապարհին՝ Porsche Cayenne մակնիշի տրանզիտ համարանիշի ավտոմեքենայի մեջ, տղամարդու դի կա։

Shamshyan.com-ի  հաղորդմամբ, ոստիկաններն ու քննիչները ավտոմեքենայի մեջ հայտնաբերել են վարորդի՝ Նոր Նորք 9-րդ զանգվածի բնակիչ՝ 36-ամյա Գեղամ Աբրահամյանի դին։

Դատաբժշկի եզրակացության համաձայն՝ նրա վրա կա հրազենի վնասվածք։ Հաշվի առնելով հանցագործության վտանգավորության աստիճանը՝ ժամանել էին նաեւ Գեղարքունիքի մարզի դատախազության դատախազները։

Մինչ տեղում աշխատում էր դատական բժիշկը, Գեղարքունիքի մարզի ոստիկանները տաք հետքերով, նշված սպանությունը կատարելու կասկածանքով հայտնաբերել են Գեղարքունիքի մարզի բնակիչ՝ 32-ամյա Արթուր Կիրակոսյանին։

Աղբյուրի ոստիկաններն ու քննիչները հայտնաբերել են նաեւ հանցագործության գործիք հրացանը։ Կասկածյալ Ա. Կիրակոսյանը քննիչի որոշմամբ ձերբակալվել է։