Գեղարքունիքում այսօրվա դրությամբ կան 176 ինքնամեկուսացված քաղաքացիներ․ Արմենպրես
Ըստ Գեղարքունիքի մարզպետարանի ԱՍԱ վարչության պետ Լուսինե Վարդանյանի ներկայացրած տեղեկատվության՝ Գեղարքունիքի մարզում այօրվա դրությամբ, կորոնավիրուսի կանխարգելման միջոցառումներով պայմանավորված, հաշվառված է 176 ինքնամեկուսացված քաղաքացի:
Ինչպես «Արմենպրես»-ին տեղեկացրին Գեղարքունիքի մարզպետարանի առողջապահության եւ սոցիալական ապահովության վարչությունից, ինքնամեկուսացվածները հիմնականում եկել են Ռուսաստանի Դաշնության տարբեր քաղաքներից: Ջերմող եւ կոնտակտավոր հիվանդներ չկան, իսկ երեխաների եւ մեծահասակների շրջանում մոտ 50 տոկոսով նվազել է դիմելիությունը առաջնային պահպանման օղակներին:
Մարզպետ Գնել Սանոսյանը վարչության պետին եւ աշխատակիցներին հորդորել է պահպանել սերտ համագործակցությունը մարզի բուժհիմնարկների հետ եւ, խնդիրներ ի հայտ գալու դեպքում, ձեռնարկել համապատասխան միջոցներ: «Զգոն եւ կազմակերպված լինենք, դիմագրավենք բարդությունները, որպեսզի խնդրահարույց օջախները կառավարելի լինեն մեր կողմից»,- ասել է մարզպետը:
