Կորոնավիրուսի հետևանքով Ստամբուլում մահացել է հայ երիտասարդ

Կորոնավիրուսի հետևանքով Ստամբուլում մահացել է հայ համայնքի երիտասարդ անդամ Հակոբ Պալթայանը: Այս մասին տեղեկացնում է arevelk.am կայքը` հղում տալով Ստամբուլում իր աղբյուրին:

Աղբյուրը տեղեկացրել է, որ Պալթայանն ուներ նաև այլ հիվանդություններ, և վերջին օրերին ջերմել սկսելուց հետո տեղափոխվել է հիվանդանոց, որտեղ էլ մահացել է:

Երկու զավակների հայր Հակոբ Պալթայանը որոշ ժամանակ գործունեություն է ծավալել որպես Յենիգյուղի Սուրբ Աստվածածին եկեղեցու թաղային խորհրդի ատենապետ:

Պալթայանի մահով Ստամբուլում կորոնավիրուսի հետևանքով մահացած հայերի թիվը հասել է 5-ի: Նրա հուղարկավորության և թաղման արարողությունները կկատարվեն սեղմ շրջանակներում՝ ենթարկվելով  տեղական իշխանութիւնների կողմից հաստատված  կանոններին:

Պոլսահայ համայնքի ղեկավարությունը շարունակում է հետևել զարգացումներին, մի շարք թաղամասերում վարչական մարմիններն օգնություն են ցուցաբերում համայնքի կարիքավոր ընտանիքներին: