Փաշինյանին քաղաքացիներից մեկը խորհուրդ է տվել կոճապղպեղ ուտել, որ կորոնավիրուսով չվարակվի

ՀՀ վարչապետ Նիկոլ Փաշինյանին այսօր «Ֆեյսբուքում» մի քանի օգտատեր հարց ուղղեցին գնաճի մասին: Վարչապետը նշեց՝ սպառողական վարքագիծը նույնպես գների վրա ազդում է. երբ մարդիկ ուզում են խուճապահար գնել, ասենք, ձկան պահածո, տարերային գնումներ են լինում, անխուսափելիորեն գնաճ է լինում:

«Գրեթե ամեն օր իմ մասնակցությամբ տեղի է ունենում քննարկում՝ իմբիրի գնաճի մասին: Գրում են՝ իմբիրը, իմբիրը, զեկուցում են, ինձ համար խնդիր էր՝ հասկանալ, թե ինչ է տեղի ունենում, մինչև մեր հայրենակիցներից մեկն ինձ զուգակցված վիդեոնամակ ուղարկեց: Ես շնորհակալ եմ նրանից այս հոգատարության համար, նա մտահոգված էր, որ կարող է կորոնավիրուսով վարակվեմ, ասում էր՝ հարյուր տոկոսով գիտի, որ իմբիրը երաշխավորում է, որ կորոնավիրուսով չես վարակվի: Նա նույնիսկ ցույց էր տվել՝ ոնց կտրտեմ իմբիրը, որ դա մաքսիմալ էֆեկտիվ լինի, ու ես հասկացա՝ ինչու է իմբիրն անվերահսկելիորեն թանկացել: Բոլորը հավատացել են՝ եթե իմբիր ուտեն, այն պատվաստանյութ է կորոնավիրուսի դեմ»,- ասաց նա:

Վարչապետը տեղեկացրեց՝ առողջապահության նախարարը պաշտոնապես ասել է՝ չկա որևէ հիմնավորում և ապացույց, որ իմբիրը կորոնավիրուսի դեմ արդյունավետ է: