Մոսկվա-Երևան չարտերային թռիչքով Հայաստան ժամանել ցանկացող 222 քաղաքացիները 14 օր կլինեն կարանտինի ռեժիմի մեջ․ պարետ
ՀՀ պարետ, փոխվարչապետ Տիգրան Ավինյանը «Ֆեյսբուքում» գրառել է, որ Մոսկվա-Երևան չարտերային թռիչքով Հայաստան ժամանող քաղաքացիները 14 օր կլինեն կարանտինում: ՀՀ պարետի գրառումը՝ ստորև.
«Սիրելի՛ հայրենակիցներ,
«Red Wings» ավիաընկերության կողմից իրականացվող Մոսկվա-Երևան չարտերային թռիչքով այսօր Հայաստան են ժամանելու Ռուսաստանի Դաշնությունում գտնվող և վերադառնալու ցանկություն հայտնած Հայաստանի Հանրապետության 222 քաղաքացիներ: Մեր քաղաքացիները մեկուսացված կարգով կտեղափոխվեն Երևանում ու Ծաղկաձորում գտնվող հյուրանոցներ, որտեղ 14 օր կլինեն կարանտինի ռեժիմի մեջ:
Տեղեկացնեմ նաև, որ րոպեներ առաջ «Red Wings» ավիաընկերությունը ՌԴ կառավարությունից ստացել է թույլտվություն իրականացնելու ևս մեկ թռիչք, որի մանրամասները կհայտնվեն հավելյալ»:
Նշենք, որ ապրիլի 6-ին Մոսկվա-Երևան չարտերային թռիչքով Հայաստան կարող են վերադառնալ բացառապես ՀՀ քաղաքացիները և նրանք կենթարկվեն 14-օրյա պարտադիր կարանտինային ռեժիմի:
