Իրանում կորոնավիրուսով վարակվածների թիվը հասել է 60 500-ի. «ՌԻԱ Նովոստի»

Իրանում նոր տեսակի կորոնավիրուսով վարակվածների թիվը հասել է 60 500-ի, որից 3739-ը՝ մահվան ելքով, հայտնում է «ՌԻԱ Նովոստի» գործակալությունը՝ հղում տալով Իրանի առողջապահության նախարարի խորհրդականի հայտարարությանը։

«Անցած օրվա ընթացքում հայտնաբերվել է կորոնավիրուսով վարակման 2274 նոր դեպք, ընդհանուր առմամբ կորոնավիրուսով վարակվածների թիվը հասել է 60 500-ի»,- հայտնել է նա Twitter սոցկայքի իր էջում՝ հավելելով, որ վարակվածներից 24 236-ն արդեն ապաքինվել է։

Նրա խոսքով՝ վերջին 24 ժամվա ընթացքում հիվանդությունից մահացել է 136 մարդ, հիվանդությունից մահվան դեպքերի ընդհանուր թիվը հասել է 3739-ի։

Իրանում մեկ օրում կորոնավիրուսով վարակման ռեկորդային թիվը 3186-ն է եղել, մահացածներինը՝ 158-ը։