Աննա Հակոբյանն իր երախտագիտությունն է հայտնել բժիշկներին

ՀՀ վարչապետի տիկին Աննա Հակոբյանը շնորհակալական նամակ ու քաղցրավենիք է ուղարկել «Նորք» ինֆեկցիոն կլինիկական հիվանդանոցի բուժանձնակազմին՝ երախտագիտություն հայտնելով նրանց աշխատանքի համար: Այս տեղեկությունը «Արմենպրես»-ի հետ զրույցում հաստատել էԱննա Հակոբյանի խոսնակ Հասմիկ Հարությունյանը:

«Տիկին Հակոբյանը հետևում է այս օրերին բժիշկների կատարած ահռելի աշխատանքին: Նամակ ու քաղցրավենիք ուղարկելը մի փոքր ժեստ է, որով Աննա Հակոբյանն իր երախտագիտությունն է հայտնում բոլոր բուժաշխատողներին, ինչպես «Նորք» ինֆեկցիոն կլինիկական, այնպես էլ մյուս բուժհաստատությունների:

Նրանք գտնվում են առաջին գծում, ցուցաբերում են բարձր որակներ, օր ու գիշեր պայքարում են համաճարակի դեմ: Տիկին Հակոբյանն իր շնորհակալությունն է հայտնել, մաղթել քաջառողջություն և նշել, որ այս անհամաչափ ընթացող պատերազմում հաղթանակը գրանցելու են բժիշկները»,- ասել է Հասմիկ Հարությունյանը: