Ամաչեցի, չէի ուզի, որ վարչապետն ինձնից ներողություն խնդրեր. կուրթանեցի երիտասարդ
Խոսելով վարչապետի արձագանքի մասին, ԼՈՒՐԵՐ․com-ի հետ զրույցում Մեխակն ասել է, որ դրանից իրեն վատ է զգացել։
«Ամաչեցի, չէի ուզի, որ վարչապետն ինձանից ներողություն խնդրեր»,- նշել է կուրթանեցի տղան՝ նշելով, որ այս պահին իրենց տուն է այցելել ԱԺ պատգամավոր, վարչապետի եղբորորդի Սիփան Փաշինյանը։
Կուրթանեցի 34-ամյա Մեխակ Առաքելյանն ասաց, որ այն օրը վարչապետի արձագանքից անակնկալի է եկել, չէր սպասում նման վերաբերմունքի, դրա համար էլ չկարողացավ լիարժեք ներկայացնել իրավիճակը։
«Սխալը ես էի, պապանձվեցի, ամաչեցի, չկարողացա խոսել։ Ֆեյսբուքներում ինչ ասես՝ գրում են իմ հասցեին, ասում են՝ «այ բոմժ», բայց չեն հասկացել, թե ես ինչ էի ուզում ասել։ Երբ վարչապետը սկսեց ջղայնանալ, ես էլ ձայն չհանեցի, այդ պահին վիրավորվեցի, բայց դե վիրավորվեմ-չվիրավորվեմ, միևնույն է՝ բան չի փոխվելու»,- ասաց Մեխակը։
Հիշեցնենք, որ մարտի 7-ին Լոռու մարզ այցի ժամանակ Կուրթանի 34–ամյա բնակիչ Մեխակ Առաքելյանը մոտեցել էր վարչապետին ու խնդրել օգնել տան հարցով։
Վարչապետ Նիկոլ Փաշինյանը Մեխակին ուղիղ եթերում հանդիմանանքով հորդորել էր աշխատել ու տուն ստեղծել եւ վարչապետին նման հարցով չդիմել։
Նշենք, որ վարչապետն այսօր ներողություն խնդրեց կուրթանեցի երիտասարդից և ՀՀ բոլոր քաղաքացիներից։
