ՏԵՍԱՆՅՈՒԹ․ Թուրքիան ոչնչացրել է սիրիական 2 կործանիչ և 103 տանկ

Թուրքիայի ազգային պաշտպանության նախարարությունը կիրակի տեղեկացրել է, որ Իդլիբի երկնքում երկու սիրիական Սու-24 կործանիչ է խոցվել: Ցամաքում շարունակվում են սիրիական բանակի և ընդդիմության ինտենսիվ բախումները։ Թուրքիան աջակցում է իր կողմնակիցներին կրակով՝ հարվածներ հասնելով սիրիական հակաօդային պաշտպանության համալիրներին ու զրահատեխնիկային։

«Ոչնչացվել է երկու ՀՕՊ համակարգ, որոնցից մեկը խոցել էր մեր անօդաչու թռչող սարքը: Սիրիայի նախագահ Բաշար ալ-Ասադի ուժերին պատկանող երկու Սու-24 ինքնաթիռ է խոցվել, որոնք հարձակում էին իրականացնում մեր օդանավերի ուղղությամբ»,- ТАСС գործակալության փոխանցմամբ՝ ասվում է հայտարարության մեջ:

Թուրքիայի պաշտպանության նախարար Հուլուսի Աքարը, կիրակի ելույթ ունենալով հեռուստատեսությամբ, հայտարարել է, որ «Գարնանային վահան» գործողության մեկնարկից ի վեր թուրքական ուժերը չեզոքացրել են սիրիացի 2212 զինվորի, ոչնչացրել 103 տանկ, 8 ուղղաթիռ, 1 անօդաչու սարք, ինչպես նաև հրթիռային արձակման կայանքներ և այլ սպառազինություն։