ՏԵՍԱՆՅՈՒԹ․ Ուղևոր «փախցնելը»` վեճի ու վթարի պատճառ
Երևանի կանգառներից մեկում հասարակական տրանսպորտի վարորդներից մեկը բանավիճել է մի վարորդի հետ ուղևորներ «փախցնելու» պատճառով։ Բանը միայն վեճով չի ավարտվել։ Դեպքը տեղի է ունեցել Կոմիտաս-Փափազյան խաչմերուկում՝ դեպի Դավիթաշենի կամուրջ տանող հատվածում, հայտնում է Shantnews-ը։
Մինչև 30 համարի երթուղայինի կանգառ հասնելը Opel մակնիշի ավտոմեքենայի վարորդը կանգնել է կանգառում, ուղևորներին առաջարկել տեղափոխել՝ հասարակական տրանսպորտի գնով։ Այդ ընթացքում կանգառ մտած 30 համարի երթուղայինի վարորդը, տեսնելով այդ ամենը, «ԳԱԶել»-ն այնպես է կանգնեցրել, որ փակվել են երթևեկության առաջին և երկրորդ գծերը։
Մարդատարի վարորդը մի քանի անգամ ազդանշան է տվել, «ԳԱԶել»-ի վարորդը տեղից չի շարժվել։ Opel-ի վարորդը փորձել է հետընթաց կատարել և շրջանցել «ԳԱԶել»-ին։ Երթուղայինի վարորդը ինքն էլ է հետընթաց կատարել՝ ճանապարհ չտալով։ Հաջորդող գործողությունների հետևանքով փոքր վթար է եղել։
Փոքրիկ բանավեճից հետո վարորդները բաժանվել են՝ յուրաքանչյուրն իր ուղևորներին տանելով։ Փոքր վթարի հետևանքով Opel-ը վնասներ է կրել։
