Իրանը ուկրաինական ինքնաթիռի սև արկղերը այլ պետությունների չի հանձնի

Իրանի արտաքին գործերի նախարար Մոհամմադ Ջավադ Զարիֆը հայտարարել է, որ Թեհրանը ինքնուրույն չի սկսի վերծանել Ուկրաինայի միջազգային ավիաուղիների կործանված ինքնաթիռի սև արկղերը, ու դրանք չի հանձնելու այլ երկրների: Այս մասին նա ասել է փետրվարի 14-ին ամերիկյան NBC News հեռուստաալիքին տված հարցազրույցում: 
 
Անդրադառնալով միջազգային օդային օրենսդրության կանոններին ՝ Զարիֆը նշել է, որ Թեհրանն իրավունք ունի հետաքննություն անցկացնել ուկրաինական Boeing 737-ի աղետի կապակցությամբ, բայց միևնույն ժամանակ խոստովանել է իր երկրի տեխնիկական անկարողությունը այդ հարցում: Նախարարի խոսքով՝ Իրանը չի կարողանա սև արկղերից տվյալներ վերծանել առանց ծրագրային ապահովման, մալուխների և լրացուցիչ տեղեկությունների Միացյալ Նահանգներից կամ արևմտյան այլ երկրներից: Ինչպես նշում է Զարիֆը, Իրանը սև արկղերը վերծանելու հարցում օգնություն է խնդրել Վաշինգտոնից, սակայն մերժում է ստացել: 

Իրանի ԱԳ նախարարի խոսով, սև արկղերը այս պահին բացվել են, սակայն դրանց վերծանման վրա ոչ ոք չի աշխատում: «Մենք չենք դիպչի սև արկղերին, առանց շահագրգիռ բոլոր կողմերի ներկայության»,-վստահեցրել է նա: 
 

Հիշեցնենք, որ ուկրաինական Boeing 737 ինքնաթիռը կործանվել է հունվարի 8-ին Թեհրանի օդանավակայանի մոտակայքում: Օդանավի բոլոր 167 ուղևորները և անձնակազմի անդամները զոհվել էին: