2019թ.-ին արտերկրից գնված էժան ավտոմեքենաների մուտքը Հայաստան դեռ շարունակվում է։ Այսօր լրագրողների հետ հանդիպմանն այս տեղեկությունը հայտնեց ՀՀ ՊԵԿ նախագահի տեղակալ Շուշանիկ Ներսիսյանը։

Նրա ներկայացրած տվյալներով` հունվար ամսին մաքսազերծելու համար ներկայացված նախնական հայտարարագրերով գրանցվել էր շուրջ 4500 ավտոմեքենա, բայց մինչև հունվարի 31–ը ներառյալ Հայաստան է հասել ու արտոնյալ մաքսատուրքերով մաքսազերծվել դրանցից 3800–ը միայն։ Մյուսներն ինչ–ինչ պատճառներով ուշացումով են տեղ հասել, ինչի հետևանքով դրանց տերերն ստիպված են եղել մաքսազերծումն իրականացնել արդեն բարձրացված գներով։

«Փետրվարի 13-ի դրությամբ ամսվա ընթացքում 80-85 ավտոմեքենա է մաքսազերծվել` արդեն իսկ նոր դրույքաչափերով։ Որոշ քանակի մեքենաներ կան, որոնք արդեն Հաաստանում են, բայց դեռ չեն մաքսազերծվել։ Մենք տեղեկություններ ունենք, որ նաև ճանապարհին գտնվող ավտոմեքենաներ կան, որոնք Հայաստան պետք է գային, բայց ինչ–ինչ պատճառներով դեռ չեն հասել»,– ասաց Ներսիսյանը։

Նրա խոսքով` մաքսային նոր վճարների չափերը ավտոներկրողների դժգոհությունն են  հարուցում։ Նրանք նաև կարծում են, թե ՀՀ կառավարությունը կարող է իր մեկ որոշմամբ շտկել իրավիճակը։ Մինչդեռ ՊԵԿ պաշտոնյան հիշեցնում է` 2020թ.–ի հունվարի 1-ից ավարտվել է Հայաստանին ԵԱՏՄ սահմաններում հատկացված արտոնյալ ժամանակը։

«Որպեսզի նման հնարավորություն մեզ ընձեռվի, այդ որոշումը պետք է կայացվի ԵԱՏՄ անդամ բոլոր երկրների կառավարությունների կողմից»,– ասաց նա։

Նոր մաքսատուրքերի պայմաններում, ըստ Շուշանիկ Ներսիսյանի, հին ավտոմեքենաներ ներկրելն այլևս ձեռնտու չէ։ Հետևաբար, ավտոմեքենաների վերավաճառքում որոշակի փորձ ձեռք բերած ՀՀ քաղաքացիներն այժմ փորձում են հարմարվել արդեն նոր պայմաններին։

ՊԵԿ փոխնախագահի խոսքով` 7 և ավելի տարվա հնությամբ 2 000 խ/սմ աշխատանքային ծավալով շարժիչ ունեցող ավտոմեքենաների մաքսազերծումը կարժենա 15-16 հազար եվրոյին համարժեք ՀՀ դրամ։