Որոշ սուպերմարկետների ցանցում շաքարավազն ինքնարժեքից ցածր է, պատճառը հասկանալու համար վարույթ է հարուցվել
Շաքարավազի շուկայի ուսումնասիրության հարցով վարույթ ենք սկսել: Այս մասին այսօր Կառավարության նիստից հետո լրագրողների հետ զրույցում ասաց ՀՀ տնտեսական մրցակցության պետական պաշտպանության հանձնաժողովի նախագահ Գեղամ Գեւորգյանը՝ արձագանքելով դիտարկմանը, թե այս շուկայում կարծես գնանկման խնդիր կա:
«Հստակ պատկերացումներ ունենք այդտեղ: Մեր ստացած ուսումնասիրությունների արդյունքում պարզվել է, որ որոշ սուպերմարկետների ցանցում շաքարավազն ինքնարժեքից ցածր է: Պատճառը հասկանալու նպատակով վարույթ ենք հարուցել»:
Գեւորգյանն ընդգծեց, որ փաստի առթիվ վարույթը հարուցված է, կա մրցակցային անհամաձայնություն կամ գերիշխող դիրքի չարաշահում. «Վարույթը կուսումնասիրենք՝ պարզ կլինի»:
Հարցին, թե արդյոք կան այլ ռիսկային շուկաներ, որտեղ ուսումնասիրություններ են իրականացվում, ՏՄՊՊՀ նախագահը պատասխանեց, որ ուսումնասիրություններ են սկսել ցորենի, ալյուրի շրջանառության, հանքարդյունաբերության, մեդիա գովազդի եւ ձվի ոլորտներում:
