ՏԵՍԱՆՅՈՒԹ. Գեղարքունիքում բերման են ենթարկվել «քրեական ենթամշակույթ» կրող անձինք

Հանցագործություն ծնող բարքերի դեմ համատեքստում հերթական հատուկ միջոցառումն է իրականացվել Գեղարքունիքի մարզում: Այս մասին տեղեկացնում է ՀՀ ոստիկանության լրատվական ծառայությունը:

Քրեական հետախուզության գլխավոր վարչության, Գեղարքունիքի մարզային վարչության ու ենթակա ստորաբաժանումների ծառայողները օպերատիվ տեղեկությունների հիման վրա տարբեր կասկածանքներով ոստիկանության Գավառի, Սեւանի, Մարտունիի, Վարդենիսի եւ Ճամբարակի բաժին բերման են ենթարկել «քրեական ենթամշակույթ» կրող եւ այդ մշակույթին հարող անձանց: Կատարվել են անձնական խուզարկություններ ու մեքենաների զննություններ, հայտնաբերվել են դանակներ, մահակներ, թմրամիջոցի նմանվող զանգվածներ եւ այլն, որոնք առգրավվել եւ ուղարկվել են փորձաքննության:

Հատուկ միջոցառման ընթացքում արձանագրվել են նաեւ ապօրինի պահվող թմբուկավոր ատրճանակի եւ նռնակի կամավոր հանձնման դեպքեր:

Նշվում է, որ հասարակական անվտանգության ապահովմանն ուղղված ոստիկանության միջոցառումներն ամենօրյա են:

«Քրեական ենթամշակույթ» կրող անձինք մշտապես ոստիկանության օպերատիվ տեսադաշտում են՝ հանուն հասարակության անվտանգության: