Գործադուլ հայտարարած միկրոավտոբուսային երթուղիների բնականոն աշխատանքը վերականգնվել է

Երևանի քաղաքապետարանից տեղեկացնում են, որ 10 միկրոավտոբուսային երթուղիների բնականոն աշխատանքը վերականգնվել է: Հիշեցնենք, որ թիվ 1, թիվ 12, թիվ 10, թիվ 19, թիվ 34 և մի շարք այլ երթուղիներ սպասարկող վարորդներն այսօր առավոտից գործադուլ էին հայտարարել։ Պատճառը գծատիրոջ կողմից օրավարձի բարձրացումն է:

«Երևանի ներքաղաքային միկրոավտոբուսային հ. 1, 10, 12, 13, 19, 21, 23, 25, 29, 34 երթուղիները սպասարկող «Երևանի ՄՈՒԱՏ» ՓԲԸ վարորդները փետրվարի 10-ի առավոտյան նախատեսված ժամին ֆինանսատնտեսական խնդիրների հիմնավորմամբ աշխատանքի դուրս չեն եկել: 

Երևանի քաղաքապետարանի համապատասխան ստորաբաժանումների և ընկերության միջև ձեռք բերված ժամանակավոր պայմանավորվածության համաձայն, մինչև առաջացած հարցերի հետագա ճշգրտումը, երթուղիների բնականոն գործունեությունը ժամը 11:30-ին վերականգնվել է», - նշված է քաղաքապետարանի տարածած հաղորդագրության մեջ։