Ուժեղ քամին Դիլիջանում ավերածություններ է արել՝ ծառեր, էլեկտրասյուներ տապալել

Երեկ՝ փետրվարի 6-ին, արտակարգ դեպք է տեղի ունեցել Տավուշի մարզում։ Ժամը 19։30-ից սկսած՝ Դիլիջան քաղաքում ուժեղ քամու հետևանքով մի քանի արտակարգ դեպքեր են տեղի ունեցել։ Ինչպես  հայտնում է shamshyan.com-ը, բնության տարերքի հետևանքով կոտրվել են մի քանի հաստաբույն ծառեր, էլեկտրասյուներ, շենքերի տանիքներից թիթեղները պոկվել ու շպրտվել են։ 

Քամին իր սև գործն է արել՝ կոտրելով հաստաբուն ու հսկայական եղևնիներ, այլ տեսակի ծառեր, և դրանց կոտրվելու հետևանքով վնասվել են նաև էլեկտրասյուներ, կոտրվել են էլեկտրալարերն ու դրա արդյունքում տևական ժամանակ տեղի են ունեցել չնախատեսված էլեկտրաէներգիայի անջատումներ։ 

Դիլիջանում վնասվել են մի քանի pպետական հաստատությունների տանիքներ, իսկ ԽՍՀՄ տարիներին կառուցված Դիլիջանի Մյասնիկյան փողոցի 76 հասցեում գտնվող, դիլիջանցիներին հայտնի «Ունիվերմագի» տանիքի մոտ 2000 քմ հատված ամբողջությամբ պոկվել և շպրտվել է։ Դրա արդյունքում վնասվել է Դիլիջանի բնակիչներից մեկին պատկանող Mercedes E320 մակնիշի 50 CA 707 համարանիշի ավտոմեքենան։