Սահմանադրական դատարանի անդամ Հրանտ Նազարյանի երեխան հայտնաբերվել է
Սահմանադրական դատարանի անդամ Հրանտ Նազարյանի՝ օրեր առաջ կորած երեխան հայտնաբերվել է:
Այս մասին «Հայկական ժամանակ»-ի հարցին ի պատասխան՝ տեղեկացրեց Ոստիկանության լրատվական բաժնի աշխատակից Զարզանդ Գաբրիելյանը:
Հունվարի 27-ին Նազարյանը դիմել էր Ոստիկանություն՝ ասելով, որ իր 8-ամյա որդուն հանձնել է նախկին կնոջը՝ Լոռու մարզի բնակչին, ով որդուն տեղափոխել է անհայտ վայր, եւ ինքը տեղեկություն չունի։ Դատավորը նշել էր, որ իր կարծիքով՝ նախկին կինը տղային առեւանգել է:
Զարզանդ Գաբրիելյանը մեր զրույցում նշեց, որ փաստի առթիվ նախապատրաստված նյութերով երեկ՝ փետրվարի 4-ին, որոշում է կայացվել Քրեական դատավարության օրենսգրքի 35 հոդվածի 1-ին մասի 2-րդ կետի հիմքով (հանցակազմի բացակայությունը) քրեական գործի հարուցումը մերժելու մասին:
Գաբրիելյանի խոսքով՝ դեպքի վերաբերյալ այլ մանրամասներ հրապարակման ենթակա չեն:
