«Հոկտեմբերի 27»-ի գործի անջատված մասով ԱԱԾ-ում քննչական խումբ է ստեղծվել. Armtimes.com

«Հոկտեմբերի 27-ի» գործի անջատված մասով ԱԱԾ-ում քննչական խումբ է ստեղծվել:

Այս մասին ՀԺ-ի հարցին ի պատասխան՝ ասել է ՀՀ գլխավոր դատախազի խորհրդական Գոռ Աբրահամյանը:

Դատախազությունն այսպիսով մասամբ բավարարել է «Հոկտեմբերի 27»-ի գործով տուժողի իրավահաջորդ Անահիտ Բախշյանի միջնորդությունը, որով վերջինս խնդրել էր անջատված գործով քննչական խումբ ստեղծել:

Վերջինիս փոխանցմամբ՝ քննության օբյեկտիվությունը, լիարժեքությունն ու բազմակողմանիությունն ապահովելու նկատառումներից ելնելով՝ նախատեսվում է ԱԱԾ քննչական խմբում ներգրավել նաև ՀՀ քննչական կոմիտեի քննիչների:

Ինչ վերաբերում է Բախշյանի մյուս միջնորդությանը, որով վերջինս խնդրում էր քրեական գործը փոխանցել քննչական այլ ենթակայության՝ ԱԱԾ-ից հանձնելով ՀՔԾ-ին, այն մերժվել է.

«Մերժումը պատճառաբանվել է նրանով, որ վարույթի իրականացումն ԱԱԾ քննչական դեպարտամենտին հանձնելու որոշումը լիարժեք համապատասխանում է քննչական ենթակայության կանոններին: Համաձայն բացարկ հայտնելու քրեադատավարական ընթացակարգի՝ բացարկ կարող է հայտնել ոչ թե քննչական մարմնին, այլ վարույթն իրականացնող քննիչին, մինչդեռ բողոքում դրա հիմքերի առկայության վերաբերյալ փաստարկներ չեն ներկայացվել»,- հայտնել է Աբրահամյանը:

Հիշեցնենք՝ Անահիտ Բախշյանը դեկտեմբերի 18-ին դիմել էր գլխավոր դատախազություն՝ պահանջելով վերացնել «Հոկտեմբերի 27»-ի գործից անջատված մասի կարճման որոշումն ու սկսել նոր քննություն։ Բախշյանի բողոքը բավարարվել էր, քրեական գործի վարույթը կարճելու մասին նախաքննության մարմնի 2004 թվականի նոյեմբերի 11-ի որոշումը վերացվել էր, և քրեական գործով նախաքննությունը հանձնարարվել էր ԱԱԾ-ին:

Մանրամասները` սկզբնաղբյուր կայքում: