Այս քննիչ հանձնաժողովի նպատակն ավելի լայն է, քան պատկերացնում եք. Սամսոնյան

ԱԺ-ում «Լուսավոր Հայաստան» խմբակցության անդամ Անի Սամսոնյանը, ի պատասխան պատգամավորների հարցերի, ներկայացրեց քննիչ հանձնաժողովի ուսումնասիրության տիրույթը` խոսելով նաև նպատակի մասին:

Նրա խոսքերով, հանձնաժողովն ուսումնասիրելու է նվիրատվությունների ցանկը, նվիրատուների կողմից ստացված ծառայությունների որոշումների պատաճառահետևանքային կապերը: Հանձնաժողովի տիրույթում է լինելու նաև հատուկ ուշադրություն պահանջող գործարքների ուսումնասիրությունը, գործարքների ռիսկայնությունը, դրանց ազդեցությունը գործարարության և ներդրումային միջավայրի վրա, ազդեցությունը Երևանի քաղաքապետարանի և ավագանու ինստիտուտի վրա: Իսկ անհրաժեշտության դեպքում կլինեն այնպիսի կառուցակարգերի և իրավակարգավորումների մշակումներ, որոնք կբացառեն հայեցողական մոտեցումը և նմանատիպ գործարքների ռիսկայնությունը:

«Սա նշանակում է, որ այս քննիչ հանձնաժողովի նպատակն ավելի լայն է, քան դուք պատկերացնում եք: Նպատակն այն է, որ մեզ տրվի գործիքակազմ՝ ուսումնասիրելու չուսումնասիրված դաշտը և կանխելու ռիսկերը»,- նշեց պատգամավորը: