Վարչապետը պատրաստվում էր գալ, ձեզ հետ հանդիպել, սակայն իմանալով, որ փողոց եք փակել, հետ է գնացել. Սարգսյան

ՀՀ վարչապետ Նիկոլ Փաշինյանի օգնական Նաիրի Սարգսյանն ընդառաջ եկավ կառավարության առջև բողոքի ակցիա իրականացնողներին: Նա, լսելով, որ ակցիայի մասնակիցները պահանջում են վարչապետի հետ հանդիպում, նրանց ասաց.

«Վարչապետը պատրաստվում էր գալ, ձեզ հետ հանդիպել, սակայն իմանալով, որ փողոց եք փակել, այդ քայլին եք դիմել, հետ է գնացել: Ես պատրաստ եմ ձեզ լսել»:

Զոհված զինծառայողի հարազատները հրաժարվեցին գալ ընդհանուր հայտարարի և պահանջեցին շուտափույտ հանդիպում վարչապետի հետ: 

Ի պատասխան՝ ակցիայի մասնակիցները հայտարարեցին՝ դիմել են իրենց այլ բարեկամների, պատրաստվում են բոլորով նաև երկաթուղին փակել:

Նշենք, որ բանակում 26 օր առաջ զոհված Արթուր Աջամյանի հարազատներն այսօր բողոքի ակցիա են իրականացնում կառավարության առջև: Նրանք ճանապարհ էին փակել՝ պահանջելով հանդիպում վարչապետ Նիկոլ Փաշինյանի հետ: Ակցիայի մասնակիցները նշում են՝ Արթուրը մահացել է 26 օր առաջ, սակայն իրենց դեռ հայտնի չէ՝ ինչ հանգամանքներում է նա զոհվել, ուստի պահանջում են այդ հանգամանքների պարզաբանում: