Շիրակավան գյուղում գազաբալոնի արտահոսքի հետևանքով պայթյուն է եղել. մանրամասներ

Գազաբալոնի արտահոսքի հետևանքով պայթյուն է տեղի ունեցել Շիրակավան գյուղի առանձնատներից մեկում։ Այս մասին հայտնում է SHANTNEWS.am-ի թղթակիցը։

Հարությունյանների տան խոհանոցում տեղադրված գազաբալոնն այդ պահին միացված չի եղել, գազօջախը չի օգտագործվել:

Տան անդամները ընդամենը խշշոց են լսել, մտել են խոհանոց և տեսել, որ բալոնի փականից ուժեղ արտահոսք կա: Ընտանիքի երեք անդամները հասցրել են արագ դուրս գալ տնից, որից րոպեներ անց տեղի է ունեցել պայթյուն: Դրա հետևանքով երկհարկանի  նորակառույց տան պատերն իրարից առանձնացել են, մասնակի փլուզվել են պատշգամբն ու տանիքը, սենյակների գույքը ևս վնասվել է, պայթյունի ալիքից պատուհանններն ու դռները շպրտվել են:

Դեպքի վայրում աշխատում էր Անիի տարածաշրջանի փրկարարական ջոկատը: Դեպքի վայրում փրկարարները կատարել էին զննություն, վտանգավոր տարածքը սահմանազատել էին, մուտքը բնակարան արգելված էր` հաշվի առնելով փլուզման վտանգը: Ընտանիքը տեղափոխվելու էր գյուղում բնակվող հարազատների տուն: