Մոսկվայում Գևորգ և Գոհար Վարդանյանների սառցե քանդակը կտեղադրվի

Մոսկովյան Պոկլոննայա բլրի վրա կտեղադրվի սառցե քանդակ՝ նվիրված խորհրդային լեգենդար հետախույզներ Գևորգ և Գոհար Վարդանյաններին, հայտնում է ria.ru-ն՝ ՌԴ արտաքին հետախուզական ծառայության մամուլի ծառայությանը հղումով։

Սառցե քանդակը զույգին կներկայացնի 1946թ․ իրենց առաջին ամուսնության ժամանակ։ Հայտնի է, որ Վարդանյաններն ամուսնացել են երեք անգամ, բայց միայն առաջինի՝ իսկական արարողության ժամանակ է Գոհար Վարդանյանը ճերմակ զգեստ կրել։ Մյուս ամուսնությունները տեղի են ունեցել հետախուզական գործողությունների շրջանակում։

Աղբյուրը մանրամասնում է, որ քանդակի բացումը տեղի կունենա երկուշաբթի՝ «Սառցե Մոսկվա» ամանորյա փառատոնի շրջանակում։

«Մենք չէինք կարող անտարբեր անցնել ամբողջ կյանքն ի շահ մեր պետության աշխատած Վարդանյանների բացառիկ ճակատագրի կողքով, և ցանկանում ենք նրանց հերոսության մասին պատմել հանրության լայն շերտերին»,- ասել է փառատոնի հեղինակ Ալեքսանդր Կովտունեցը։