ՀՀ պաշտպանության նախարարությունում աշխատանքից ազատվել են մի շարք բարձրաստիճան պաշտոնյաներ՝ ORSIS-ի հետ ստեղծված իրավիճակով պայմանավորված, սակայն հիմնական մեղավորները դեռեւս պատժված չեն: Այս մասին РИА Новости- ի հետ զրույցում ասել է ORSIS ռուսական զինագործական ընկերության ներկայացուցիչը։ 

«Մինչ այժմ անհայտ է, թե ինչու չկա պաշտոնական պատասխան ՀՀ ՊՆ-ի հետ հանդիպելու մասին մեր հրավերին: Մենք ստացել ենք տեղեկություններ այն մասին, որ, որպես նմուշներ, նախարարությանը տրամադրած մեր МО-երը յուրացվել են ՀՀ ՊՆ-ի կոնկրետ պաշտոնյաների կողմից»,- նշել է նա:

Ընկերության ներկայացուցիչը նշել է, որ ORSIS ռուսական զինագործական ընկերությունում տեսնում են առաջընթաց Հայաստանին ռազմական տեխնիկա մատակարարելու մասին ավելի վաղ կասեցված մրցույթի գործընթացում:

Հիշեցնենք՝ ORSIS-ին ներառել էին ՀՀ ուժային կառույցներին զենք մատակարարող ընկերությունների «սեւ ցուցակ»-ում անմիջապես մրցույթից հետո, որի արդյունքներով ընկերությունը մի քանի միլիոն դոլարի զենք պետք է մատակարարեր Հայաստանին: ՌԴ առեւտրի նախարարությունն ավելի ուշ պաշտոնական նամակ էր ուղարկել ՀՀ պաշտպանության նախարար Դավիթ Տոնոյանին՝ հայկական կողմի որոշումն անընդունելի եւ ոչ տրամաբանված համարելով:

Նշենք, որ պարզաբանում ստանալու նպատակով փորձել ենք կապ հաստատեց ՀՀ ՊՆ մամուլի խոսնակ Արծրուն Հովհաննիսյանի հետ, սակայն չհաջողվեց։