Արդեն դոնոր կազմակերպությունը նախապատրաստական աշխատանքներ է իրականացնում, որպեսզի մասնագետներ ներգրավեն եւ կարողանանք Երեւանի տրանսպորտային խնդրի կարգավորման համար ավտոբուսների ձեռքբերման համար մրցութային փաթեթներ պատրաստել: Այս մասին, այսօր՝ դեկտեմբերի 25-ին, Երեւանի ավագանու նիստում հայտարարեց Երեւանի քաղաքապետի առաջին տեղակալ Հրաչյա Սարգսյանը:

«Եթե ամեն ինչ հարթ գնա, փետրվարին մրցույթ կհայտարարենք, որը թույլ կտա ձեռք բերել ավտոբուսներ: Իհարկե, գիտեք, որ նոր ցանցի համար ավտոբուսների քանակը բավականին մեծ է, միանգամից այդ ավտոբուսների արտադրությունը դժվար կլինի: Ակնկալվում է, որ որոշ քանակ կունենանք 2020 թվականին, հետո տեղի կունենան համալրումներ:  Քննարկման արդյունքները վերջնական են, կառավարության հետ համաձայնության ենք եկել»,-ասաց նա:

Փոխքաղաքապետը նաեւ հավելեց, որ երբ կունենանք ստորագրված փաստաթուղթը, բոլորին կտեղեկացնենք, այդ թվում ժամկետների մասով, իսկ նախնական բյուջեն 120-150 մլն դոլար է: Նրա խոսքով, ավտոբուսները պետք է ձեռք բերվեն վարկային միջոցներով, քանի որ քաղաքն այդքան գումարներ չունի: