ՏԵՍԱՆՅՈՒԹ․ Բնակարանային գողության դեպքեր են բացահայտվել

ՀՀ ոստիկանության լրատվական ծառայությունը տեղեկացնում է, որ դեկտեմբերի 10-ին՝ ժամը 17-ի սահմաններում, Վանաձորի Նար-Դոսի փողոցի մի բնակիչ ոստիկանության Բազումի բաժնում հաղորդում էր տվել, որ դեկտեմբերի 9-ից 10-ը տեխնիկական միջոցների գործադրմամբ բացել են իրենց առանձնատան դուռը և հափշտակել կենցաղային իրեր: 
Ոստիկանները մեկնել են դեպքի վայր, ուսումնասիրել տան տարածքը, կազմել համապատասխան արձանագրություններ: Գողության փաստով հարուցվել է քրեական գործ: 
Բացահայտման ուղղությամբ լայնածավալ հետախուզական միջոցառումներ են ձեռնարկվել: Օպերատիվ հարցումների արդյունքում շուտով տեղեկություններ են ստացվել, որ գողությունը հնարավոր է՝ կատարած լինի Վանաձորի Ամիրյան փողոցի 38-ամյա մի բնակիչ: 
Դեկտեմբերի 19-ին կասկածվողը Ներսիսյան փողոցից բերման է ենթարկվել ոստիկանության Բազումի բաժին: 
Գողոնը մասամբ հայտնաբերվել է: 
Հետագա միջոցառումներով պարզվել է, որ 38-ամյա տղամարդը 2019 թվականին Վանաձորում կատարել է ևս ութ բնակարանային գողություն և գողության փորձեր: 
Հանգամանքները պարզվում են: 

Հարուցված քրեական գործի նախաքննությունը շարունակվում է: