Բրեգովիչի չեղարկված համերգի տոմսերի գումարները կվերադարձվեն

Հայտնի երաժիշտ Գորան Բրեգովիչի չեղարկված երեւանյան համերգի տոմսերը կվերադարձվեն: «Հայկական ժամանակ»-ի հետ զրույցում վստահեցրել է կազմակերպիչ AVM Production ընկերության պրոդյուսեր Վիկտորյա Մալոյանը: Համերգն ի սկզբանե նախատեսված էր հոկտեմբերի 18-ին Կարեն Դեմիրճյանի անվան մարզահամերգային համալիրում, սակայն տեղափոխվեց նոյեմբերի 24-ին: 

Հետագայում այն ընդհանրապես չեղարկվեց, երբ հայտնի դարձավ, որ Երեւանի քաղաքապետարանի հրավերով Բրեգովիչն Ամանորի գիշերը ելույթ է ունենալու Հանրապետության հրապարակում:

ՄՀՀ-ում նախատեսված միջոցառման տոմսերն արժեին 5-60 հազար դրամ: Վերջերս սոցցանցերում բողոքներ էին հայտնվել, ըստ որոնց՝ կազմակերպիչները տոմսերը հետ չեն վերցնում, սակայն Մալոյանը ՀԺ-ին ասաց, որ այդպես չէ: Նա նշեց, որ գնորդների գումարները վերադարձվում են փուլ առ փուլ: Ասաց, որ վաճառված տոմսերի մոտ 40%-ի գումարները դեռ պետք է վերադարձվեն: Այս պահին AVM Production-ը հանդիսատեսին խնդրում է համբերատար լինել եւ հայտնում, որ գումարները կվերադարձվեն ժամանակացույցից փոքր շեղումով:

Մալոյանը նաեւ ասաց, որ մինչեւ հիմա վաճառված տոմսերի գումարները վերադարձվում են սեփական միջոցներից: Նա նշեց, որ համերգին պատրաստվելիս AVM Production-ը կանխավճար է փոխանցել Բրեգովիչին, ինչպես մարզահամերգային համալիրին (դահլիճի վարձակալության համար) եւ Հայաստանի պետական սիմֆոնիկ նվագախմբին:

 Նրա խոսքով՝ այս վճարումներից ոչ մեկը AVM Production-ին չի վերադարձվել, այդ պատճառով էլ տոմսերի գումարների վերադարձումը կատարվում է անձնական միջոցներից: AVM Production-ը պաշտոնական նամակ է ուղարկել Բրեգովիչի ներկայացուցիչներին գումարը վերադարձնելու խնդրանքով, սակայն դեռ պատասխան չի ստացել: