25-ամյա երիտասարդը տանիքից վայր է ընկել ու ծայրահեղ ծանր վիճակում տեղափոխվել հիվանդանոց
Այսօր՝ դեկտեմբերի 24-ին, արտակարգ դեպք է տեղի ունեցել Կոտայքի մարզում; Ժամը 14։10-ի սահմաններում Եղվարդ քաղաքի «Նաիրի» բժշկական կենտրոնից ահազանգ է ստացվել ոստիկանության Նաիրի բաժին, որ բժիշկների հերթապահ խումբը «պոլիտրավմա» ախտորոշմամբ «Արմենիա» բժշկական կենտրոն է տեղափոխվել մի քաղաքացու, ով գտնվում է ծայրահեղ ծանր վիճակում։
Ինչպես հայտնում է ֆոտոլրագրող Գագիկ Շամշյանը, հիվանդանոց են մեկնել ոստիկանության Նաիրիի բաժնի օպերատիվ խումբը՝ բաժնի պետ Հայկ Թումանյանի և քրեական հետախուզության բաժանմունքի պետ Գևորգ Նահապետյանի գլխավորությամբ։
Մինչ բժիշկները պաքարում են վիրավորի կյանքի համար, Նաիրիի ոստիկանները պարզել են, որ հիվանդանոց տեղափոխվածը Երևան քաղաքի բնակիչ՝ 25-ամյա Վարդգես Գ-ն է, ով աշխատում է «Սամվել Բաբայան» ՍՊԸ-ում։ Նաիրի ոստիկանները պարզել են նաև, որ ժամը 14։00-ի սահմաններում Վարդգես Գ-ն Եղվարդ քաղաքի Շիրակի 30 հասցեում գտնվող «Հայատանի էլեկտրացանցեր» Փակ Բաժնետիրական Ընկերության «Նաիրի» մասնաճյուղի հետնամասում գտնվող պահեստային շենքի տանիքին տեսանկարահանման սարք տեղադրելիս անզգուշաբար վայր է ընկել և ծայրահեղ ծանր ախտորոշմամբ տեղափոխվել է հիվանդանոց:
