Շուրջ 90 մլն դրամի խախտումներ են հայտնաբերվել «Հայաստան» համահայկական հիմնադրամում ․ ՊՎԾ
«Հայաստան» համահայկական հիմնադրամում» Հայոց ցեղասպանության 100-րդ տարելիցին նվիրված միջոցառումների շրջանակներում կատարված ծախսերի մասով խախտումներ են հայտնաբերվել 89,942.7 հազար ՀՀ դրամ արժեքով կնքված գործարքների վերաբերյալ։ Այս մասին հայտնում են ՊՎԾ-ից։
ՀՀ հաշվեքննիչ պալատի կողմից 2018-2019թթ. իրականացվել է ստուգում «Հայաստան» համահայկական հիմնադրամում Հայոց ցեղասպանության 100-րդ տարելիցին նվիրված միջոցառումների շրջանակներում կատարված ծախսերի մասով:
Հայաստանի Հանրապետության պետական վերահսկողական ծառայության կողմից Հիմնադրամում վերահսկողություն է իրականացվել բացառապես «Հաշվեքննիչ պալատի մասին» ՀՀ օրենքով ՀՀ հաշվեքննիչ պալատի լիազորություններից դուրս գտնվող եւ վերջինիս կողմից չստուգված հարցերի նկատմամբ:
Ուսումնասիրության ընթացքում խախտումներ են հայտնաբերվել 89,942.7 հազ. դրամ արժեքով կնքված գործարքների վերաբերյալ: Մասնավորապես, համերգների կազմակերպման ծառայություններ մատուցող ընկերության կողմից չի պատրաստվել ֆիլմ եւ չեն կազմակերպվել համերգներ պայմանագրով սահմանված ծավալներին համապատասխան, սակայն հիմնադրամի կողմից ծառայությունն ընդունվել է եւ իրականացվել է վճարում:
Ուսումնասիրության արդյունքում Հիմնադրամին եւ «Հայոց ցեղասպանության թանգարան-ինստիտուտ» հիմնադրամին իրականացվել են առաջարկություններ www.armeniangenocide100.org կայքի հանձնում-ընդունումն իրականացնելու եւ շահագործելու ուղղությամբ միջոցներ ձեռնարկելու վերաբերյալ։
