Երևանում թալանել են ՀՀ գլխավոր դատախազության վիճակագրական բաժնի պետի տունը։ Այս մասին տեղեկացնում է Shamshyan.com-ը` նշելով, որ անհայտ անձը կամ անձինք երեկ Երևանում թալանել են Աջափնյակ վարչական շրջանի բնակիչ Աննա Բադալյանի բնակարանը:

Դեպքը տեղի է ունեցել երեկ 17:30-ից մինչև 19:00-ն ընկած ժամանակահատվածում։ Տեխնիկական միջոցների գործադրմամբ Դավիթաշեն 4-րդ թաղամասի 46 շենքի բնակիչ Բադալյանի տան դուռը բացել են, տակնուվրա արել այն և ննջասենյակից հափշտակել գումար:

Հափշտակված գումարի չափը չի նշվում։

Sputnik Արմենիայի թղթակցի հետ զրույցում ոստիկանությունից հաստատեցին, որ երեկ Դավթաշենում կատարված բնակարանային գողության վերաբերյալ ահազանգ Ոստիկանություն ստացվել է։ Սակայն ոչ հաստատեցին և ոչ էլ հերքեցին այն տեղեկությունները, թե թալանված տունը պատկանում է ՀՀ գլխավոր դատախազության վիճակագրական բաժնի պետին։