Քաղաքապետարանի արձագանքը` երթուղայինի վարորդի ոգելից խմիչք օգտագործելու վերաբերյալ քաղաքացու ահազանգին

Auroranews-ը  ահազանգ էր ստացել, որ Երևանի թիվ 67 համարի միկրոավտոբուսի վարորդները օղի են խմում երթուղու վերջնակետում, ապա շարունակում աշխատանքը:

Մեր զրուցակիցը հայտնել էր, որ նկատել է, թե վարորդներն ինչպես են կենաց ասում, օղի խմում և նստում ղեկին:  «Տեսա, որ խմեցին, հետո ուղևորներ հավաքվեցին և դուրս եկան երթուղի»,- մեզ հետ զրույցում ասել է ականատեսը: 

Երևանի քաղաքապետարանի Տեղեկատվության և հասարակայնության հետ կապերի վարչության պետ Հովսեփ Կուբատյանը Auroranews-ի հետ զրույցում նշեց, որ իրենք գնացել են ահազանգի հետքերով ու ճշտել, որ լուսանկարներում երևացող տղամարդը երթուղայինի վարորդը չի եղել։ 

«Տվյալ մեքենայի վարորդը ընդհանրապես ոգելից խմիչք չի օգտագործում՝ կրոնական նկատառումներից ելնելով»,- մեզ հետ զրույցում ասաց Կուբատյանը։