ՏԵՍԱՆՅՈՒԹ. Ռուսաստանում հայտնաբերվել է երկրի խոշորագույն նարկոլաբորատորիան
Ռուսաստանի Դաշնության ՆԳՆ աշխատակիցները Մերձմոսկվայում հայտնաբերել են երկրի խոշորագույն նարկոլաբորատորիան: Այս մասին հայտնում է РИА Новости-ն՝ հղում անելով երկրի ՆԳՆ պաշտոնական ներկայացուցչին:
«Գործարանը» տեղակայված է եղել Սերպուխովսկի շրջանի նախկին գյուղատնտեսական նշանակության տարածքում: Այնտեղ են գտնվել յուրաքանչյուրը 200-ից 500 հազար ռուբլի արժողությամբ քիմիական ռեակտորներ, որոնց մեջ են մշակվել սինթետիկ թմրանյութերի համար նախատեսված բաղադրիչները:
ՆԳՆ ներկայացուցիչ Իրինա Վոլկը հայտնել է, որ կազմակերպված հանցախումբը վաճառել է արգելված միջոցները ինտերնետ-խանութների միջոցով, որոնք թաքնված են եղել ցանցի ստվերային հատվածում:
Հատուկ գործողության արդյունքում ոստիկանները հայտնաբերել են 18 առաքում դեպի Նովոսիբիրսկ, Տվերսկ, Վլադիմիրսկ, Կուրսկ, Կալուգա, Արխանգելսկ, ինչպես նաեւ Թաթարստան, Բուրյատիա, Խաբարովսկ ու Պրիմորսկի շրջան:
Ընդհանուր առմամբ առգրավվել է ավելի քան 100 կգ թմրամիջոց՝ բյուրեղացված վիճակում, կես տոննա՝ հեղուկ վիճակում, 4 տոննա քիմռեակտիվներ, ավելի քան 600 կգ այլ տեսակի թմրամիջոց, 7 քիմիական ռեակտոր, ինչպես նաեւ տարատեսակ սարքավորումներ:
Ձերբակալվել են 3 քիմիկ-տեխնոլոգներ Ուկրաինայից, փաթեթավորող-առաքիչ եւ այդ ամենի կազմակերպման մեջ կասկածվող 1 անձ:
Բոլոր բերման ենթարկվածները ձերբակալվել են, հարուցվել են մի շարք քրեական գործեր:
