Վրաստանում արտահերթ ընտրություններ չեն անցկացվի․ Կախա Կալաձե

Թբիլիսիում ցուցարարները գիշերել են վրացական խորհրդարանի շենքի մուտքի մոտ, հաղորդում է InterPressNews լրատվական գործակալությունը:

Ողջ գիշեր խորհրդարանի մոտ գտնվող տարածքը հանգիստ է եղել՝ բացառությամբ մի քանի փոքր միջադեպի:

Խորհրդարանի շենքի տարածքում տեղադրվել են բազմաթիվ վրաններ: Նշվում է, որ ցուցարարները բարիկադներ են կառուցել Չիտաձեի, Զուբալաշվիլիի և Չիչինաձեի փողոցներում ու խորհրդարանի շենքի մուտքերի մոտ:

Չնայած բողոքի ակցիաներին՝ Վրաստանի իշխանություններն արտահերթ ընտրություններ չեն նշանակի, գրում է РИА Новости-ն՝ հղում անելով իշխող «Վրացական երազանք» կուսակցության գլխավոր քարտուղար Կախա Կալաձեին։

«Մինչ ընտրությունների անցկացումը մեկ տարուց քիչ ժամանակ է մնացել։ Ընտրությունները կանցկացվեն խառը ընտրական համակարգով՝ գործող սահմանադրությամբ, ըստ սահմանված կանոնների և ամսաթվերի։ Մեր մրցակիցներին կոչ ենք անում պատրաստվել ընտրություններին»,- ասել է Կալաձեն երկուշաբթի՝ ճեպազրույցի ժամանակ։

Կալաձեն խորհրդարանի մուտքն արգելափակող ընդդիմադիրների գործողություններն ապակառուցողական է անվանել։

«Եթե նշված գործողությունները շարունակվեն, իշխանությունները համապատասխան որոշում կընդունեն»,- ասել է Կալաձեն։