Ինձ և իմ տեղակալներին աշխատանքից ազատելու վարչապետի որոշումը պայմանավորված է կառուցվածքային փոփոխություններով, և դրան շատ դրական եմ վերաբերում: Այս մասին Tert.am-ի հետ զրույցում ասել է   ռազմական տեսուչի պաշտոնից վարչապետի որոշմամբ ազատված Մովսես

Հակոբյանը: 

«Վարչապետի որոշումները քննարկման ենթակա  չեն, այլ ենթատեքստ մի  փնտրեք»,-նշել է նա: 

Անդրադառնալով  հարցին՝ գուցե Մարտի 1-ի գործի հետ առնչություն ունի, որի շրջանակներում ինքն ունի վկայի կարգավիճակ, Մովսես  Հակոբյանն ասաց․ «Բացարձակ  կապ չունի: Բացե՛ք,  կարդացե՛ք․  որոշման  հիմքը  գրված է»,-նշել է նա: 

Մովսես  Հակոբյանը  հերքեց նաև, որ  ազատումը կարող է  կապված լինեն Ապրիլյան պատերազմի հետ: Նա  տեղեկացրեց նաև, որ ապրիլյան պատերազմի հանգամանքներն ուսումնասիրող հանձնաժողով չի հրավիրվել: 

Հիշեցնենք, որ այսօր ՀՀ վարչապետ Նիկոլ Փաշինյանը որոշում է ստորագրել Մովսես Հակոբյանին՝ Գլխավոր ռազմական տեսուչի, Կամո Քոչունցին՝ նրա առաջին տեղակալի, իսկ Վաչագան Ներսիսյանին՝ տեղակալի պաշտոններից ազատելու մասին։