Կոռուպցայի կանխարգելման հանձնաժողովի առաջադրված բոլոր թեկնածուները հաջողված են, Աժ-ում Կոռուպցիայի կանխարգելման հանձնաժողովի անդամների ընտրության հարցի քննարկման ժամանակ ասաց «Բարգավաճ Հայաստան» խմբակցության պատգամավոր Սերգեյ Բագրատյանը:

Վերջինս նշեց, որ այս մարմնի ձևավորումից հետո հանրային իրավագիտակցության բարձրացման ուղղությամբ պետք է աշխատել:

Անդրադանալով նրան, որ այս մարմնում բացի կառավարության, Բարձրագույն դատական խորհրդի և «Իմ քայլի» թեկնածուներից, տեղ կգտնեն նաև խորհրդարանական երկու ընդդիմադիր ուժերի թեկնածուները՝ Բագրատյանը կոչ արեց սա չհամարել «լավություն» ուղղված ընդդիմությանը:

«Այս կառույցում ընդդիմությանը տեղ տալն իմ գործընկերը կարևորեց այնքանով, որ ընդդիմությունը չխռովի: Սա չեմ կիսում, սա քաղաքական կարևոր որոշում է, ընդդիմության թեկնածուի ներկայությունը հանձնաժողովում խիստ կարևոր է իշխանության համար: Հանրային վստահություն ունենալու համար իշխող քաղաքական ուժը պետք է հնարավորինս ընդլայնի ընդդիմության ներկայացվածությունը բոլոր մարմիններում: Սա է լավագույն ապացույցը, որ իշխանությունը թափանցիկ է աշխատելու», - ասաց Բագրատյանն՝ ավելացնելով. 

«Մենք պետք է պետություն կառուցենք, որտեղ ընդդիմությունը պետք է նույնքան իշխանություն ունենա, ինչքան իշխանությունը: Միայն այդ դեպքում կարող ենք ունենալ հզոր պետություն: Ամեն օր դուք պետք է շնորհակալ լինեք, որ ունեք մեզ պես ընդդիմություն: Չի կարող ուժեղ իշխանություն լինել առանց ուժեղ ընդդիմության: Ամեն օր պետք է շնորհակալ լինեք, որ մեզ պես ընդդիմություն ունեք ու ստիպված եք ձեզ վրա աշխատել: Այս իմաստով ևս շնորհավորում եմ ձեզ»: