Թեև բյուջեում չկա որևէ հիշատակում հաջորդ տարի 10 միլիոն ծառերի տնկման ծրագրի ֆինանսավորման մասին, սակայն այնտեղ առկա է անտառվերականգնման ծրագիրը, որը լինելու է այդ 10 միլիոնի ծրագրի մի մասը։ Այս մասին այսօր Ազգային ժողովում հայտարարեց շրջակա միջավայրի նախարար Էրիկ Գրիգորյանը։

Նրա խոսքերով՝ այդ ծրագիրը լինելու է համահայկական, բայց բանակցություններ են տարվում այլ երկրների հետ՝ համատեղ ֆինանսավորում իրականացնելու համար։ Եվ բարեկամ երկրներից մեկը, ըստ նախարարի, խոստացել է 1 միլիոն տնկի անվճար տրամադրել Հայաստանին։

Նախարարը նաև տեղեկացրեց, որ առանձնացվել են այն տարածքները, որտեղ լինելու է ծառատունկը, և որոշվել են այն ծառերի տեսակները, որոնք տնկվելու են։