![Մեզ զայրացրեց ՀՀ վարչապետի խոսքը. Անաիդա Մովսիսյան](https://auroranews.am/storage/img/base_image/old/9fea7b21fe7cb8e90843b30a61cf9ce3.webp)
Մեզ զայրացրեց ՀՀ վարչապետի խոսքը. Անաիդա Մովսիսյան
![Մեզ զայրացրեց ՀՀ վարչապետի խոսքը. Անաիդա Մովսիսյան](https://auroranews.am/storage/img/base_image/old/9fea7b21fe7cb8e90843b30a61cf9ce3.webp)
ԵՊՀ հայ բանասիրության ֆակուլտետի ուսանողները դասադուլ են հայտարարել բուհական ծրագրերում «Հայոց լեզու», «Հայոց պատմություն» և «Հայ գրականություն» առարկաները ոչ պարտադիր դարձնելու օրինագծի պատճառով:
Բանասիրության ֆակուլտետի դասախոս Վարդան Պետրոսյանն ուսանողների նախաձեռնությունը տեղին ու ճիշտ համարեց: Ըստ նրա՝ սկզբում դպրոցներում պետք է դասավանդման որակը բարձրացվեր, հետո նոր մտածեին այդ առարկաները բուհերում ոչ պարտադիր դարձնելու մասին: Հայոց լեզուն, գրականությունն ու պատմությունը այն առարկաներն են, որոնք ազգային դիմագիծ են ձևավորում:
Հայոց լեզվի պատմության ամբիոնի դոցենտ Նարինե Դիլբարյանն էլ, անդրադառնալով Հարվարդի ու այլ համալսարանների հետ համեմատությանը, թե այնտեղ էլ լեզու ու պատմություն չեն անցնում, նկատեց՝ այդ պարագայում նախ՝ պետք է համեմատել Հարվարդի համալսարանի բյուջեն, ուսանողների ու դասախոսների համար ստեղծված պայմանները, հետո նոր մեզնից պահանջել այնպիսի մակարդակ, որոնք Հարվարդն արդեն հաղթահարել է:
Բանասիրության ֆակուլտետի հայոց լեզվի ամբիոնի դասախոս Անաիդա Մովսիսյանն էլ նշեց. «Մեզ զայրացրեց ՀՀ վարչապետի խոսքը: Օրենքի նախագիծը դեռ քննարկման փուլում է, սակայն նա դրա մասին խոսում է կանխորոշված դատավճռի նման: Հարցը դասախոսների հետ անգամ չի քննարկվել»,- ասաց նա:
Ակցիայի կազմակերպիչ ու մասնակից ուսանողներն ասացին, որ արդյունքի չհասնելու դեպքում պատրաստ են բողոքի ակցիա իրականացնել նախարարության ու կառավարության շենքերի առջև: