ՏԵՍԱՆՅՈՒԹ. Արցախում մահացած 19-ամյա Էրիկը մոր միակ զավակն էր
Արցախի զորամասերից մեկում նոյեմբերի 4-ին հրազենային վնասվածքից մահացած 19-ամյա զինծառայող Էրիկ Հարությունյանի հարազատները չեն հավատում նրա՝ ինքնասպանություն գործելու վարկածին:
Էրիկի հարազատները վերջին անգամ նրա հետ խոսել են դեպքից մեկ օր առաջ:
«10 րոպեից ավել խոսել է տատու հետ: Ասել է՝ լավ է, ամեն ինչ նորմալ է, առհասարակ բանակից չի բողոքել: Տատն ասում էր՝ հնարավոր չէր, որ մեր տղան էդպիսի բան աներ, մի օրվա մեջ ինչ պիտի փոխված լիներ երեխայի մոտ»,- NEWS.am-ին ասել է նրանց հարևանուհին՝ Զինա Ավետիսյանը՝ նշելով, որ Էրիկը արձակուրդ էր եկել 20 օր առաջ, լավ տրամադրությամբ է եղել:
Էրիկը միակողմանի ծնողազուրկ էր, մոր միակ զավակը:
Ավելի վաղ հայտնել էինք, որ ըստ քննչական կոմիտեի տարածած հաղորդագրության՝ նոյեմբերի 4-ին՝ 19:30-ի սահմանում հայտնաբերվել է պարտադիր ժամկետային զինծառայող, շարքային Էրիկ Արարատի Հարությունյանը՝ կզակի շրջանում հրազենային վնասվածքով, զինվորական հոսպիտալ տեղափոխվելու ճանապարհին նա մահացել է:
Հարուցվել է քրգործ ՀՀ քրեական օրենսգրքի 110-րդ հոդվածի 1-ին մասով (իքնասպանության հասցնելը):
