Նախատեսվում է կառուցել մոտ 10 կմ երկարությամբ ծովափնյա հետիոտն ճեմուղի
ԱԺ «Իմ քայլը» խմբակցության պատգամավոր Հայկ Սարգսյանը ֆեյսբուքյան իր էջում գրում է․
««Սևան» ազգային պարկի՝ Լճաշեն-Սևանի թերակղզի հատվածում հանգստի գոտու ստեղծման և ներդրումների համար բարենպաստ միջավայր ստեղծելու նպատակով՝ նախատեսվում է մշակել նշված հատվածի գոտևորման նախագիծ: Նախատեսվում է կառուցել շուրջ 10 կմ երկարությամբ ծովափնյա հետիոտն ճեմուղի (promenade), այն կսկսվի Մ-4 և Մ-10 մայրուղիների հատման կետից և կավարտվի Սևանավանքի մուտքի մոտ։
Ճեմուղին կկառուցվի տեղական բնական քարերով, երեսապատումը՝ բազալտե կամ գրանիտե սալիկներով: Պրոմենադին զուգահեռ կկառուցվի 2.5 մետր լայնությամբ հեծանվային ուղի, որը ճեմուղուց կբաժանվի կանաչ բաժանիչ շերտով:
Ծովափնյա հետիոտն ճեմուղու երկայնքով նախատեսվում է ստեղծել քոթեջային, հյուրանոցային կառուցապատման գոտիներ, ընդմիջելով դրանք՝ առևտրի, սպասարկման, սննդի օբյեկտների, լանդշաֆտային զբոսայգիների, մանկական պարկերի, ակտիվ հանգստի և զվարճանքի գոտիներով։ Ճեմուղու սկզբնական հատվածում, միջնամասում և թերակղզում նախատեսվում է կառուցել նավամատույցներ»։