Դիանա Գասպարյանը` «Դոն Պիպոյի» ծրագրերի մասին

Քաղաքապետարանը Արթուր Ասատրյանի ներկայացրած քրիստոնեական համալիր-զբոսայգու նախագիծը փատաթղթային տեսքով դեռ չի ստացել: 

Այս մասին Sputnik Արմենիայի հետ զրույցում ասել է Էջմիածնի քաղաքապետ Դիանա Գասպարյանը։

«Այդ մասին բանավոր խոսել ենք, սակայն հիմնադրամի ներկայացուցիչներին ես տեղեկացրել եմ, որ այն տարածքը, որտեղ նախատեսվում է կառուցել այդ ամենը, հանձնված է երկարաժամկետ  վարձակալության և համայնքի սեփականությունը չէ, հետևաբար, ծրագրի մասին խոսելն իրատեսական չէ»,- նշել է  Գասպարյանը: 

Էջմիածնի քաղաքապետի հաղորդմամբ՝ գործընթացն իրականացնելու համար պետք է նախևառաջ մի քանի փուլ անցնել. 

«Նախ ներկայացվում է նախագիծ-նախահաշիվը, քննարկվում է, այնուհետև ստացվում է ճարտարապետական առաջադրանք, տարածքը պետք է լինի համայնքային, ինչից հետո քաղաքապետարանը կտա շինարարության թույլտվություն»,- ասել է Գասպարյանը: 

Նրա խոսքով` Էջմիածինում, որևէ կոթող տեղադրելիս, Մայր Աթոռի հետ համաձայնեցումը կարևոր է: Թեև, ներկա պահին ավելի շատ ընթանում է տեսական, քան առարկայական խոսակցություն, այդուհանդերձ, քաղաքապետարանում բաց են ցանկացած քննարկման համար։

«Չմոռանանք, որ այդ տարածքները դեռ համայնքի հաշվեկշիռ վերադարձնելու խնդիր ունենք»,- ընդգծել է Գասպարյանը:  

Բացի այդ, քաղաքապետարանը պետք է վստահ լինի, որ քաղաքի կենտրոնում լայնածավալ շինարարություն սկսելու և ավարտելու միջոցները, կամ գոնե այդ միջոցների 70-80 տոկոսը կա: 

«Ծրագիրը բավական մեծ ֆինանսական միջոցներ է պահանջում և դեռ ինֆորմացիա չունեմ, թե նախատեսված միջոցների քանի տոկոսն է հավաքագրվել»,- ասել է նա։     

Մինչդեռ կառույցի հեղինակները համոզված են, որ այն լինելու է յուրօրինակ հավաքատեղի՝ Հայաստան-սփյուռք կապող օղակ, որտեղ ծնվելու են նոր գաղափարներ ու նախագծեր` Հայաստանն աշխարհին ներկայացնելու և ավելի ճանաչելի դարձնելու համար: