«Փաստ» թերթը գրում է․ «Արտաքին գործերի նախարարի տեղակալ Գրիգոր Հովհաննիսյանի՝ ՀՀ դրամով ստացած եկամուտների հանրագումարը 2018 թվականին կազմել է 10 000 000 ՀՀ դրամ: Նշված եկամուտը շահաբաժին է:

Այս մասին տեղեկանում ենք ՀՀ բարձրաստիճան պաշտոնատար անձանց էթիկայի հանձնաժողովի պաշտոնական կայքում հրապարակված՝ Գ. Հովհաննիսյանի՝ 2018թ. տարեկան հայտարարագրից: Փոխնախարարը հայտարարագրել է նաև 45 000 ԱՄՆ դոլար եկամուտ, որը գոյացել է աշխատավարձից, ինչպես նաև 35 000 ԱՄՆ դոլար եկամուտ, որը գոյացել է ստացված փոխառություններից (վարկեր):

Հայտարարատու պաշտոնատար անձի դրամական միջոցը 2018թ. հարկային տարվա սկզբում կազմել է 7000 ԱՄՆ դոլար: 2018թ. հարկային տարվա վերջում նշված դրամական միջոցն անփոփոխ է մնացել:

Հայտարարատու պաշտոնատար անձի հարկային տարում ձեռքբերած և օտարած շարժական գույքը ենթաբաժնից էլ տեղեկանում ենք, որ ԱԳ փոխնախարարը 2018թ. հարկային տարում 30 000 ԱՄՆ դոլարով ձեռք է բերել «TOYOTA HIGHLANDER 3.0» մակնիշի ավտոմեքենա:

Գ. Հովհաննիսյանը ԱԳ փոխնախարար է նշանակվել 2018թ. դեկտեմբերին, մինչ այդ զբաղեցնում էր ԱՄՆ-ում ՀՀ արտակարգ և լիազոր դեսպանի պաշտոնը»։