Դատախազությունը ուսումնասիրում է Վազգեն Մանուկյանի կնոջ գրառման վերաբերյալ պատգամավորի դիմումը
ՀՀ գլխավոր դատախազությունը ստացել, մուտքագրել եւ ուսումնասիրման առարկա է դարձրել ՀՀ ԱԺ պատգամավոր Արման Բաբաջանյանի դիմումը, որով պատգամավորը ՀՀ գլխավոր դատախազից խնդրել է Հանրային խորհրդի նախագահ Վազգեն Մանուկյանի կնոջ՝ Վարդուհի Իշխանյանի ֆեյսբուքյան գրառման հետ կապված վերցնել հաղորդում եւ այն ուղարկել համապատասխան հոդվածներով ուսումնասիրության:
Մեր հարցմանն ի պատասխան՝ Դատախազության հանրային կապերի բաժնից հայտնեցին, որ Բաբաջանյանի դիմումը ուսումնասիրվում է Վարդուհի Իշխանյանի ֆեյսբուքյան գրառման հետ համադրության մեջ՝ հաշվի առնելով, որ վերջինիս կողմից այդ գրառմամբ, բացի դատախազությունից, նաև այլ իրավապահ մարմիններին ուղղված պնդումներ կային: «Ուսումնասիրության արդյունքների մասին կտեղեկացնենք»,- մասնավորապես նշվում է մեզ փոխանցված պատասխանում:
Հիշեցնենք, որ նախօրեին ԱԺ պատգամավոր Արման Բաբաջանյանը դիմել է ՀՀ վարչապետին՝ Վազգեն Մանուկյանին պաշտոնանկ անելու պահանջով: Արձագանքելով այդ դիմումին եւ Բաբաջանյանի բերած հիմնավորումներին՝ Վազգեն Մանուկյանի կինը ֆեյսբուքյան գրառմամբ դիմել էր իրավապահներին՝ առաջարկելով պարզել, թե Բաբաջանյանի «ֆինանսական աղբյուրները, շքեղ տունը, հարուստ ԶԼՄ-ն» որտեղից են: «Դիմում եմ ԱԱԾ-ին, որ պարզի Բաբաջանյանի կապը օտարերկրյա ծառայությունների հետ։ Եվ ուզում նաև պարզել, թե ինչպես եղավ, որ Բաբաջանյանը ու Հունանյանը 1998-ին աշխատել են միասին Կարեն Դեմիրճյանի շտաբում»,- գրել էր Իշխանյանը:
