Գողություն կատարելու պահին բռնվեց (տեսանյութ)
Ոստիկանության Արտաշատի բաժնի քրեական հետախույզները տարաբնույթ միջոցառումների արդյունքում օպերատիվ տվյալներ ստացան, որ Արտաշատի բնակիչ 37-ամյա մի տղամարդ հոկտեմբերի 28-ին Վերին Դվին գյուղում պետք է բնակարանային գողություն կատարի։ Ի դեպ, թիրախ ընտրված տան բնակիչները այդ օրը պետք է հարսանեկան արարողության մասնակցեին․ տանը մարդ չէր լինելու։
Արտաշատի ոստիկանների տեղեկությունները ճիշտ էին։ Հոկտեմբերի 28՝ ժամը 17.30-ին, տղամարդը տեխնիկական միջոցների գործադրմամբ բացեց տան պատուհանը, մտավ ներս, սակայն հանցագործությունն ավարտին չհացրեց։ Արտաշատի քրեական հետախույզները նրան բերման ենթարկեցին բաժին, ապա ներկայացրին տարածքային նախաքննական մարմնին՝ հարցաքննության։
Բնակարանային գողության փորձի փաստով քրեական գործ է հարուցվել։ Բերման ենթարկվածը ձերբակալվել է։ Հանգամանքները պարզվում են։
