Ոստիկանության ծառայողների բացատրական աշխատանքի արդյունքում՝ հոկտեմբերի 24-ին տարածքային մի քանի ստորաբաժանումում արձանագրվել է ապօրինի պահվող զենք-զինամթերքի կամավոր հանձնման դեպքեր։

Երևանի բնակիչ 60-ամյա մի տղամարդ ոստիկանության Քնաքեռ-Զեյթունի բաժին է բերել ինքնաձիգ։ Նրա հայտնածով՝ հրազենը պատկանել է հանգուցյալ հորը։

Ախուրյանի բաժին եկած 61-ամյա կինն էլ, որը Շիրակի մարզի բնակիչ է, կամավոր հանձնեց գործարանային համարը ջնջված հրացան ու ինքնաձիգի 20-ից ավելի փամփուշտ։ Նրա հայտնածով՝ զենք-զինամթերքը գտել է տան նկուղը մաքրելիս։

Մարալիկում ապրող 57-ամյա մի տղամարդ էլ ոստիկանության Անիի բաժին է բերել երկփողանի հրացան։ Նրա հայտնածով՝ հրազենը գտել է ավտոտնակը մաքրելիս ու անմիջապես բերել ոստիկանություն։

Կոտայքի մարզի Քարաշամբ գյուղի բնակիչ, 39-ամյա մի տղամարդ էլ ոստիկանության Նաիրիի բաժնում կամավոր հանձնել է որսորդական հրացան ու ինքնաձիգի փամփուշտներ՝ հայտնելով, որ դրանք պատկանել են հանգուցյալ հորեղբորը։

Ոստիկանության Գուգարքի բաժին եկած 67-ամյա տղամարդն էլ, որը Լեռնապատ գյուղի բնակիչ է, կամավոր հանձնեց որսորդական հրացան։ Նրա հայտնածով՝ հրազենը գտել է գոմի տանիքը վերանորոգելիս։

Նշանակվել են դատաձգաբանական փորձաքննություններ։
Հիշեցնենք, որ ապօրինի պահվող զենք-զինամթերքը կամավոր հանձնողներն ազատվում են քրեական պատասխանատվությունից։