Լավ կլինի ինքը խոսի պատճառների մասին. Արման Սարգսյանը՝ Քոչարյանի ազատման մասին

Հովհաննես Քոչարյանը փոխոստիկանապետի պաշտոնից ազատման դիմում է գրել սեփական նախաձեռնությամբ։ 

Այս մասին NEWS.am–ի հետ զրույցում ասել է  ՀՀ ոստիկանության պետի ժամանակավոր պաշտոնակատար Արման Սարգսյանը՝ մեկնաբանելով Հովհաննես Քոչարյանի պաշտոնանկությունը։ Սարգսյանը  հայտնեց, որ Քոչարյանի հետ խոսել է ազատման պատճառների մասին, սակայն չցանկացավ մանրամասնել։ 

Հարցին՝ արդյոք իր համար ընդունելի է Քոչարյանի ազատումը, Սարգսյանն արձագանքել է. 

«Լավ կլինի ինքը խոսի պատճառների մասին, միգուցե ինքն ավելի ծանրակշիռ պատճառներ ունի»։ 

Իսկ այն հարցին՝ փորձե՞լ է արդյոք համոզել նրան, որ ազատման դիմում չգրի, ոստիկանապետի պաշտոնակատար ասել է. 

«Եթե համոզած լինեի կամ չլինեի, դա որևէ բան չի փոխելու, եթե մարդը որոշել է, նշանակում է որոշել է»։ 

Արման Սարգսյանն  այնուամենայնիվ փաստեց՝  համակարգից հեռացած Քոչարյանը պրոֆեսիոնալ կադր էր։ 

«Հովհաննես Քոչարյանը լավ իրավաբան է»,–ասել է նա։ 

Հիշեցնենք, որ Հովհանես Քոչարյանը երեկ՝ հոկտեմբերի 23–ին ազատման դիմում էր գրել, որը վարչապետ Նիկոլ Փաշինյանն արդեն ստորագրել է։ 

Նա փոխոստիկանապետ էր նշանակվել 2018 թվականի մայիսի 18-ին։ 

Ազատման դիմումը գրելուց մեկ օր առաջ Հովհաննես Քոչարյանը հայտարարել էր, որ կողմ չէ ոստիկանապետի պաշտոնը քաղաքական դարձնելուն: 

«Ոստիկանության կարծիքը չի համընկնում նախագծի հեղինակների կարծիքի հետ: Մենք մեր կարծիքն ունենք Ոստիկանության կազմակերպման և գործունեության կարգի վերաբերյալ ու ռազմավարության ծրագրի հրապարակումից հետո բոլորը կկարողանան ծանոթանալ դրան: Դրանում մանրամասն հիմնավորել ենք` ինչպես ենք տեսնում Ոստիկանության կառուցվածքը, ինչպես ենք պատկերացնում նրա նկատմամբ քաղաքական վերահսկողության մեխանիզմները»,- նշել էր Քոչարյանը: 

Նրա խոսքով՝ նախագիծը պայմանավորված է քաղաքական նպատակահարմարությամբ, որն իրավիճակային լուծումներ է առաջարկում: