Վթարի հասցված վնասները գնահատելու համար կատարվում է քննություն. պղնձամոլիբդենային կոմբինատ
Զանգեզուրի պղնձամոլիբդենային կոմբինատից հայտարարություն են տարածել դեպի Արծվանիկի պոչամբար գնացող խողովակաշարի վթարից արտահոսքի վերաբերյալ։
«Այսօր՝ հոկտեմբերի 17-ին, ժամը 5-ի սահմաններում համապատասխան ստորաբաժանման հերթափոխի աշխատակիցները նկատել են պոչատարի խողովակի արտահոսք և անմիջապես տեղեկացրել իրենց անմիջական ղեկավարին, ինչպես նաև դյուկերային անցումների պատասխանատուին։
Արտահոսքը տեղի է ունեցել վերընթաց խողովակից։ Վնասված 1000մմ խողովակը դատարկվել է վթարային դեպքերի համար նախատեսված ավազան, և նշված խողովակի ամբողջ ծավալն ուղղվել՝ այլընտրանքային խողովակ։
Ընկերության աշխատակիցները վթարը կանխել են 30-40 րոպեների ընթացքում։ Այս ժամանակահատվածում վթարային ավազանից տեղի է ունեցել որոշակի արտահոսք դեպի գետ։
Վթարի մանրամասները պարզելու, վթարի հասցված վնասները գնահատելու համար կատարվում է ներքին քննություն։
Վթարի մասին տեղեկություն է տրամադրվել Հայաստանի Հանրապետության բնապահպանության և ընդերքի տեսչական մարմնի տարածքային ստորաբաժանում», - նշված է հայտարարության մեջ։
