Ասում են, որ Իջևանում հրդեհները դիտավորյալ են անում. Ցոլակյան
Երեկ Հայաստանում գրանցվել է միանգամից 50 հրդեհ, և դա արդեն խնդիր է դառնում Արտակարգ իրավիճակների նախարարության համար։ Այս մասին կառավարության այսօրվա նիստի ժամանակ հայտարարեց ԱԻ նախարար Ֆելիքս Ցոլակյանը։
Նա նշեց, որ Բերդում, Տավուշի մյուս մասերում ներկայում հրդեհները շարունակվում են նաև անտառամերձ գոտում։ Ցոլակյանը նաև հայտնեց, որ հրդեհներ են կրկնվում հրաձգարանների մոտ։ Նախարարի պնդմամբ՝ հրաձգարանի դեպքում դեռ պարզ է՝ ինչպես են սկսվում հրդեհները, մյուս դեպքերում հասկանալի չէ։
«Էսօր էլ մեկը մի բան է գրել, որ Իջևանում հրդեհները դիտավորյալ են անում, էս են անում, էն են անում։ Էս մի քիչ պրոբլեմատիկ է դառնում», – ասաց Ցոլակյանը։
Նախարարը նշեց, որ հիմա ծառերի մոտ ամենաչոր շրջանն է, և իրենց բախտը բերել է, որ անտառների խոտածածկ տարածքները այրվում են, բայց ծառերը մնում են անվնաս։
